Tauhi fakatolonga ‘o e hu‘ahuhu´

‘Oku lava ke tauhi fakatolonga ‘a e hu‘ahuhu´.

Manatu‘i ke ngāue‘aki ha hina kuo ‘osi haka ke tauhi ai ‘a e hu‘ahuhu´.

‘E lava ke ke tauhi fakatolonga ‘a ho hu‘ahuhu´ ‘i he ‘aisi fakamokomoko´ ‘o a‘u hake ki he houa ‘e 48 ‘i he tikilī selisiasi ‘e 2-4 (‘oku fa‘a tuku eni ‘i mui ‘i he konga ki lalo ‘o e ‘aisi´, ‘o ‘oua ‘aupito ‘e tuku ‘i he matapaa´).

‘E lava ke tuku ‘a e hu‘ahuhu´ ‘i he tu‘unga māfana pē ‘o e loki ‘oku mou ‘i ai´ ‘o a‘u hake ki he houa ‘e 4.

‘E lava ke tauhi fakatolonga ‘a ho hu‘ahuhu´ ‘o a‘u hake ki he māhina ‘e 3 ki he 6 kapau ‘oku tuku ‘i he ‘aisi fakapoloka´ (freezer).

Tuku ke mole ‘a e poloka´ ‘i loto pē ‘i he loto ‘aisi fakamokomoko´.  Ko ‘ene vaia´ pē pea faka‘aonga‘i leva ia.

‘E ngali sai‘ia ‘a ho‘o pēpee´ ke mafana ‘a ‘ene hu‘akau´.  ‘Ai eni ‘i ha hina ‘o fokotu‘u ‘i ha vai vela pea tuku eni ke a‘u hake ki he tu‘unga māfana tatau mo e māfana ‘o e sino´ pea toki fafanga.  (‘Oku ‘ikai poupou‘i atu hono fa‘o eni ‘i he maikoloueivi´ koe‘uhi´ ko e tōkehekehe ‘a e fua māfana´ ‘a ia ‘e ala vela ai ‘a e ngutu ‘o ho‘o pēpee´, pea ‘e hanga ‘e he vela ko ia´ ‘o tamate‘i ‘a e ngaahi ivi polotini mo e ngaahi nāunau faito‘o ‘i loto ‘i he hu‘ahuhu´).

Hili pē ‘a hono fakamafana´, pea kimu‘a ‘i he fafanga´, lulu ma‘u pē ‘a e hina hu‘akau´ ke fefiohi lelei pea ‘ahi‘ahi‘i ‘a hono mafana´ ‘aki hano lulu‘i hifo ‘o ha ngaahi mata‘i tulutā ki ho kia‘inima´.  ‘Oku totonu ke ki‘i māmāfana pē eni ‘i he ‘ene tau ‘i ho kili´.